正所謂，不患寡而患不均。出咗半斤力，人哋就攞番足八両，自己就淨係得四両，你話唔嬲就假嘅。

太一叮講緊嘅，之唔係醫管局嘅醫生囉。係人都知，醫管局醫生冇自己嘅薪酬調查方法，向來沿用嘅酬薪機制都係同公務員水平掛鈎，共同進退。點不知政府最近決定按「薪酬水平調查」調整公務員薪酬，其中高級公務員獲額外加薪百分之三，並可追溯至舊年十月，當局竟然以調查結果不適用於政府資助機構為由，拒絕讓醫管局約三千名醫生及高級員工受惠。亦即係話，同遮唔同柄，同樣係公院醫生，非公務員嘅人工低一截，變相「一院兩制」，咁都得？

不可不知，當年公務員減薪，醫管局醫生要一齊減薪；家陣高級公務員獲額外加薪，醫管局醫生就冇份，唔怪得唔少醫生覺得唔公平，「情緒激昂」喇。有醫生組織透露，後日會喺伊利沙伯醫院大堂發起靜坐行動，表達不滿喎，呢場爭拗都唔知點收科。嗱，咪話太一叮唔提醒，前線醫護人手緊缺，本來已經係七個蓋冚十個煲，早就做到一頭煙兼成肚火，如果再因加薪問題搞到士氣低落，分分鐘又爆大鑊嘅咋，玩吓手甚至加速流亡潮添，當局唔盡快拆彈，最終受害嘅咪又係病人！

話時話，醫管局管理烏煙瘴氣，肥上瘦下，公立醫院醫生同工不同酬，已經係老問題咯，公務員同非公務員待遇固然同人唔同命，唔同時間入職，人工亦係差天共地。醫管局喺○○年調低公立醫院醫生嘅入職薪酬同頂薪點，九九年前後入職嘅，月薪可以相差近三萬元，醫管局醫生嘈到拆天，結果又係靜坐抗議收場，亂象沒完沒了。

當然啦，醫生話晒薪高糧準，比公務員同事收少啲，頂多都係道氣chok住啫，比起政府內部萬多個合約工，算好幸福嘅喇。呢啲合約工待遇遠低於同等職級嘅公務員，有啲部門薪酬相差甚至達到兩成或以上，有人捱咗十幾年都冇得「轉正」，淪為無晉升、無福利、無加薪、無保障、無前途嘅「五無」人士，真係講起都一殼眼淚。香港仲話有乜鬼嘢平機會喎，呃鬼咩！

唉，今時今日香港家嘈屋閉，爭拗多多，社會戾氣已經夠重，港府施政無能都算嘞，仲喺度加薪自肥，簡直係自製矛盾，添煩添亂，盞自己攞嚟衰嘅咋，叮！