城中鏡：名人帽子戲法
尋日沙田馬場舉行仁濟盃賽事，一眾仁濟醫院董事局成員帶埋家人同好友入場玩。見仁濟前主席董吳玲玲同副主席Macy黃美斯都戴住設計別致嘅禮帽，細問之下，原來佢哋啱啱一齊去澳洲玩，今次主要行程係購買馬匹，但意外發現當地嘅禮帽又靚又平，佢哋因而夾定，齊齊戴帽入馬場，眾人見到都讚靚。董太仲爆料話Macy大手掃入五大箱添！
董吳玲玲（右）、黃美斯（左）同董太孫女Molly戴澳洲買嘅禮帽。
蔡寶健（右）同太太張桉瑩帶埋一對子女入場玩。
林煒珊（左）、蘇陳偉香（中）同仁濟總理孫蔡吐媚齊撐仁濟盃。
Macy解釋大手掃入五大箱禮帽之謎，佢話一來啲帽真係好平，一頂都只係幾百蚊，若喺香港買，一頂起碼要三、五千蚊，所以佢買咗十幾頂送畀朋友。咁又係，香港百物騰貴，加上澳幣、日圓等貨幣都大跌，變相令港人出埠旅行時，好似購買力強咗，買嘢都疏爽啲喇！
朱穎詩明春喜迎第三胎
講到最近多個國家貨幣貶值，仁濟總理兼Bannershop主席蔡寶健就牙痛咁聲，因為佢盤生意海外市場佔咗七成，近排多國貨幣展開貶值競賽，自己都損失唔少。同場仲有仁濟副主席王賢訊嘅太太Vincci朱穎詩肚凸凸，原來佢已懷有第三胎，預產期係明年春天，Vincci笑稱自己「五年抱三」，生完呢胎就可以收工。
而仁濟主席林煒珊亦招呼年輕人入場玩，仲同本月生日嘅仁濟人切蛋糕慶生。仁濟前主席蘇陳偉香亦好忙，佢三月卸任後，即接任仁濟歷屆總理聯誼會執行委員會主席，首要任務係令停頓多年嘅聯誼會恢復運作，以延續仁濟人嘅情誼。
