政壇：動議辯論排大隊 泛民拉布自作孽
據立法會秘書處最新文件顯示，立法會大會至今已積壓最少三十七項由議員提出無約束力嘅動議辯論，部分更排極都未上到議事日程，因而變成明日黃花。好似身兼支聯會主席嘅白鴿黨「AV仁」何俊仁，原本排隊辯論六四事件，排到依家都已經十月，但仲未被抽中；公文袋黨魁「袋巾傑」梁家傑則一早提出就對行政長官投不信任票進行辯論，等到依家，都仲係得個等字。睇怕泛民中人今次終於親身承受拉布嘅禍害，真正明白乜嘢叫自作自受嘞！
立會大會逢周三舉行，按照規定，每次有兩名議員提出無約束力動議辯論，如果輪候提出嘅議員數目多過兩個，就會以抽籤形式決定，確保六十八名議員都有機會被抽中，以便提出關注嘅議題。有議員透露，未有拉布文化時，每位議員喺每個立法年度，基本上可提出一次動議辯論，換言之，合共四年會期，就有四次機會。
AV仁提「六四」 隨時排到下年
時移勢易，本屆立會四年任期已過咗三年，過去三年都遇上財政預算案拉布，閒閒地都被拖延兩、三個月，每年白白浪費最少十六次動議辯論機會，絕對係小數怕長計。
資料顯示，截至上周五嘅統計，立會至今積壓三十七項動議辯論，有唔少主題因拉布，早已失去最佳辯論時機。好似AV仁提出六四事件，原本係為今年六四事件提出，最後趕唔切，要由黨友代為提出。之不過佢分分鐘錯有錯着，事關距離明年六四事件，仲有八個月，如果佢一直抽唔中，而又繼續等落去，分分鐘可以提早辯論六四事件，真係好滑稽。
最後一個立法年度餘下二十多次大會，如一切順利，無遇上拉布，先有可能處理晒近四十項動議辯論，呢個仲未計有議員插隊提出緊急休會辯論等。相信議員對於拉布嘅遺禍，都有深切嘅體會喇！
