政壇：不約而同渡海泳 兩副局終點相遇
自從維港渡海泳復辦後，每年都有唔少立法會議員報名參賽，但好多人最後都甩底。今年渡海泳再冇議員報名，但就有兩名副局長參賽，包括啱啱升職冇耐嘅政制及內地事務局副局長Ronald陳岳鵬，同埋曾經連立會主席都噏唔出佢個名嘅商務及經濟發展局副局長梁敬國，唔通兩人想藉機博吓曝光？
梁敬國（左）同陳岳鵬喺維港渡海泳終點相遇。
首次參加渡海泳嘅梁敬國話，之前有同Ronald喺中大練水，但並冇約埋去參賽，游游吓先喺終點前遇到對方。佢話自己喺泳池游一千五百米，最快紀錄係喺四十一分鐘內完成，但尋日就冇為自己計時。對於有泳手投訴今年海面多咗垃圾，佢就唔多覺，感覺游得好暢順，明年如無意外會繼續參加。
之前游過渡海泳嘅Ronald就自言今次表現只係普通，事關已有一段時間冇練水喎。唔知佢係咪因為升咗職，工作量大咗，搞到少咗訓練呢？
