早前喺嶺大「粗口歌」風波中要求解散學生會嘅律師會前會長何君堯,最近被特首委任為嶺大校董,引起學生不滿。何君堯尋日出席港台節目《城市論壇》時,一方面批評啲學生英文差,但自己又將早於九九年升格做大學嘅嶺大,多次講錯咗做「嶺南學院」,唔怪得之啲學生質疑佢冇資格做嶺「大」校董喇!

何君堯喺論壇上回應點解提議解散學生會時,佢就以學生寫錯英文做例子,話如果學生將尋日日期由「November 18th」寫成「November 18st」,佢就會叫啲學生改番啱,寓意有錯就要改喎,認真無厘頭。不過,之後佢又最少兩次將「嶺南大學」叫咗做「嶺南學院」,真係有口話人冇口話自己。

同場嘅中大學生會會長王澄烽就多次質疑,何君堯對大學和高等教育界缺乏認識,無資格做校董。何君堯對學生指控不為所動,竟聲稱自己一向有做慈善工作,喺中學、小學同幼稚園都工作過,對教育不遺餘力,獲委任做校董,絕對係正常同適當。佢又話自己曾經係大學生,仲話自己係法律博士,點會冇資格做校董。

王澄烽反駁話:「我都係大學生,咁我係咪等同了解高等教育?」王又質疑何君堯唔了解乜嘢係博雅教育。對於學生要求承諾維護院校自主同學術自由,何君堯話呢件事係應有嘅情操,但拒絕開出空頭支票,佢話:「咁係單純和蠢,講咗做唔到點算?」而佢對院校自主,亦有與別不同嘅解釋,認為院校自主係按照校內現有機制運作,唔係一個人說了算,被學生批評係邏輯荒謬!

第一手消息請下載on.cc東網iPhone/iPad/Android/Windows Phone Apps