澳門賭場百花齊放，應有盡有，吸引唔少旅客慕名而至。查實香港亦有唔少賭場吖，好似公立醫院咁吖，烏龍百出，事故頻頻，病人入到去，同賭博冇乜分別嘅咋，賭贏係好彩，賭輸咗隨時連命都不保，問你怕未。

唔係危言聳聽o架，瑪嘉烈醫院日前又出事嘞。話說該院深切治療部護士懷疑忘記重啟呼吸機，令一名男病人心跳停頓，最終不治離世。你話嘞，手機唔記得開震機就見得多啫，人命關天嘅醫療設施都唔記得開，唔止兒戲，直頭係匪夷所思！

一如既往，發生咁嚴重嘅醫療事故，食物及衞生局局長高永文例牌要出嚟解畫啦。佢話對事件感到遺憾，懷疑涉及人為錯誤，醫管局已向病人家屬致歉，並要求院方八星期內完成調查報告，搵出原因及提出預防方法。佢又話喎，如果涉及重要醫療程序，醫護人員單獨行事風險大，日後會要求互相覆檢添。

叮，邊個唔知阿媽係女人吖，次次出事都係講呢套，高永文唔厭，市民都聽到厭啦。其實有邊次醫療事故唔係涉及人為錯誤吖，最離譜嘅係，據講呢次唔止係個別醫護出錯，而係「一整隊醫護人員嘅錯誤」，個個矇查查，一齊犯咁低級嘅錯誤，好明顯係冇帶個心返工，簡直攞人命較飛。

係人都知，公立醫院七國咁亂，診錯症、開錯刀、打錯針、輸錯血等等，無日無之，無奇不有，一早唔係新聞嘞。弊在當局每次都話深入調查，每次都話吸取教訓，可惜每次都係大隻講，求其交份報告敷衍民意，然後不了了之。

最荒謬嘅係，有人問高永文係咪需要追究管理層嘅責任，佢即刻大耍太極，話現階段不可妄下判斷，如有管理層須負責會按程序處理喎，講咗等於冇講。嗱，港產官僚一味護短，與其「刑不上高層」，不如搞搞新意思，「醫到無求膽自大」吖，笨!

老實講，公立醫院千瘡百孔，病入膏肓，唔使問醫生都知病根所在，咪就係醫管局管理混亂囉。高層正經事唔做，只顧肥上瘦下，搞到前線資源不足，人手短缺，七個蓋冚十個煲，做到個個踢晒腳，冇晒士氣，唔出事至奇。

計太一叮話齋，治病須治根，依家最需要入深切治療部嘅係醫管局，再唔盡快開刀動大手術，清理瘀血，遲早嗚呼哀哉嘅咋，叮！