政壇：搞搞政：3議員搶閘 質詢酷刑聲請
酷刑聲請個案迭創新高，更衍生「假難民」問題，治安亦不靖，早前有三位立法會議員不約而同，打算喺月底嘅立法會大會上提出質詢，包括口頭質詢嘅謝偉俊（Paul）同書面質詢嘅葉國謙，原本仲有鄧家彪，但係手快有、手慢冇，而且亦冇必要重複質詢，所以鄧褪咗軚，改為關注強積金。咁多人爭住問，皆因真假難民問題係大事，阿Paul搶到口頭質詢，鋤深啲都係件好事。
本月二十八日嘅立法會大會，分別有兩條口頭質詢及一條書面質詢涉及酷刑聲請申請宗數、審批情況、涉及的公帑，以及有否對教唆假難民來港做黑工的中介公司展開偵查等。其中一條口頭質詢仲指出，有關酷刑聲請制度充滿漏洞，九成以上申請人其實都不符資格，但佢哋仍然可以借助各種手段，長年滯留香港。之前入境處處長陳國基都有提過，現時大部分提出酷刑聲請等免遣返申請嘅人都並非真難民，有人濫用機制來香港，只是為了尋找更好的生活，要防止法律及機制被濫用。
Paul：市民怕使「冤枉錢」
阿Paul話，當局曾就有關問題搵佢商討，據悉當局有意收緊酷刑聲請嘅申請程序；加上早前有正在申請酷刑聲請嘅印度籍男子涉嫌在港鐵站內斬人，不少市民向他反映，不滿有關申請嘅審批拖得太耐，擔心政府使太多「冤枉錢」，因而提出質詢。提出書面質詢嘅議員葉國謙都話，現時酷刑聲請申請個案上升速度驚人，對社會有潛在危險。
