政壇：膽大飲鉛水葉劉唔介意

自言「官到無求膽自大」嘅政務司司長林鄭月娥，日前在立法會發官威，批評議員要官員當眾飲鉛水，係一種屈辱，難為有市民長期飲鉛水，如此刻薄、涼薄嘅言論，被議員批評為「膽生毛但冇心肝」。曾以「妹妹」形容林鄭嘅行政會議成員兼立法會議員葉劉淑儀尋日就話唔擔心飲一、兩杯鉛水會威脅健康，仲話如果佢喺現場，唔會介意飲鉛水。

葉劉話飲鉛水唔係大問題，佢本人就唔會擔心飲一、兩杯鉛水會影響健康，又話其實講嘅含鉛超標，真正危害健康嘅都係少數人，不過，葉劉都補口話，唔知議員逼官員飲鉛水時嘅環境係點、係咪有人以粗暴方式逼官員，令官員覺得壓迫喇。