政壇：馬逢國遊冰島 有進「脹」
體育、演藝、文化及出版界立法會議員馬逢國早前去旅行三個星期，其中超過兩星期係坐郵輪（圖），因為預咗好多時間都會喺郵輪上逗留，為免去完旅行身形發脹，馬逢國喺出發前，就減定肥先。點知，即使佢出發前已減去五磅，但去完旅行返港，依然重咗九磅，始終都有所進「脹」。
馬逢國早前同屋企人及朋友坐郵輪，去格陵蘭同冰島睇火山及冰川，佢話，雖然喺郵輪上都有游吓水，落船時都有行山，但去完旅行返港，都係肥咗九磅，要急急減磅。佢話可能因為一返到香港就好多會要開，比較忙碌，加上佢除咗蔬菜之外，乜都食少咗，所以好快又減咗十磅。
