林鄭無品膽自大 港產官僚皆姓賴

話說鉛水風波爆發超過三個月，搞到滿城風雨，人心惶惶，問題遲遲未能解決。立法會尋日辯論由泛民議員提出引用特權法徹查鉛水事件嘅議案，要求追究失職官員嘅責任，結果喺建制派護航下被否決，得個嘈字。

其實，呢個結果完全係意料中事，本來唔值得大驚小怪，最令人嘆為觀止嘅係，政務司司長林鄭月娥唔止瞓身為水務署和房屋署失職官僚護航，死撐鉛水問題被「政治化」，仲語不驚人死不休，爆咗句「官到無求膽自大」，聲稱有膽承認制度不足，有膽冒被批評護短嘅風險，為盡心盡力嘅公務員討回公道喎。為咗護短去到咁盡，難怪港產官僚稱呼佢為「奶媽」喇，可惜吖，市民聽到都忍唔住媽媽聲。

有冇搞錯，作為父母官，理應勤政愛民，唐太宗李世民貞觀之治垂範千古，係靠知人善用，虛心納諫，文治武功，並非係靠膽大。林鄭口出狂言，幾乎仲巴閉過李世民咁滯，都好大官威啫。

冇錯，部分泛民政客借鉛水風波抽水，呢點無疑係事實，尤其係區議會選舉臨近，為咗爭取選票，仲唔去到盡咩。不過咁，政府無能亦係不爭嘅事實，鉛水風波爆發咁耐，當局一直拖拖拉拉，唔諗辦法解決問題不特止，反而瞞得就瞞，瞞唔到就一味卸責，淨係識搵承建商同水喉匠開刀。之前發表嘅兩份調查報告，完全冇提官僚失職，擺明官官相衞，當局授人以柄，結果被政客咬實唔放，呢啲咪叫唔衰攞嚟衰囉。

老實講，鉛水危害市民健康，問題嚴重，立法會要求調查真相及追究責任，都好正常啫，港產官僚如果唔係心中有鬼，又使乜咁緊張呢？佢哋究竟係膽大，定係心虛呢？

都係古人講得啱，德不稱其任，其禍必酷；能不稱其位，其殃必大。家陣香港七國咁亂，皆因呢班官僚尸位素餐，添煩添亂，無事爭領功，有事爭卸膊，林鄭「膽大」又點吖，以為可以自把自為，簡直離奇過《官場現形記》，盞自己出醜嘅咋。

計太一叮話齋，求人不如求己，見到呢啲膽大妄為、目中無人嘅官僚，唔使客氣，見一個叮一個就啱嘞，叮！