城中鏡：中國派對文化 送禮玩Surprise
中國派對文化專出Cosplay（角色扮演）服裝同性感內衣，佢哋尋日首日掛牌，究竟佢哋送紀念品畀港交所會有乜新奇搞作？結果真係估佢哋唔到，竟然係一件白玉，仲係一個傳統過傳統嘅巨形平安扣。
中國派對文化主席陳聖弼（右）竟然送件白玉畀港交所。
以為佢哋出Cosplay衫同性感內衣，就必定追求刺激嘅文化；點知佢哋話平安扣外形「通體圓滑」，代表「中庸之道」，平安扣內圈仲象徵公司「內心平靜安遠」咁話。
佢哋仲話平安扣係中國傳統文化傳承，佢哋就致力於傳統文化與當代文化交融。係喎，Cosplay時常見到有性感旗袍，睇怕係咁解。
件紀念品同個寓意都咁出人意表，中國派對文化今趟完全發揮出Party嘅精髓——就係Surprise！
