城中鏡：省靚港招牌
近期市道差，點搞呢？要諗計。成立一年幾嘅香港品牌總商會（總商會）早前舉行周年晚宴，會長趙振國報喜話該會已成功申請政府嘅專項基金三百多萬元，用喺發展品牌同拓銷內地市場，預計年底可以喺上海設立五千多呎的展示及交易中心。此外，總商會將喺明年舉辦首屆「香港品牌大獎」，一於趁市道淡靜，省靚香港金漆招牌。
趙振國（中）、王偉（左）同鄧乃蔚（右）睇好喺上海設立香港品牌展示中心。
朱仲賢對明年嘅「香港品牌大獎」好期待。
黃業光（右）同徐珊雯都認為匯聚唔同品牌一齊推廣，力量更大。
品牌大獎講創意
趙振國話將會喺上海設立嘅香港品牌專門店，為期一年，既可讓會員展示自家品牌，亦可當作香港品牌喺內地尋找合作夥伴或代理分銷嘅重要平台。該會常務副會長王偉同副會長鄧乃蔚就話，港商應把握今次機會，大舉進攻內銷市場。
講起首屆「香港品牌大獎」，總商會理事朱仲賢話獎項唔強調業界之間嘅競爭，而係按最具創意、最具社會責任、最具影響力等項目頒發獎項，冀藉此嘉許唔同行業嘅品牌，加深香港品牌喺中港及國際嘅形象及實力。
香港鐘表業總會前主席John黃業光同副主席Elise徐珊雯都有出席，身兼總商會副會長嘅阿John話打造品牌每天都要做，無論市場係旺市定係淡市，佢做鐘錶品牌近三十年，希望可以分享省招牌嘅經驗。Elise就話香港有好多唔同類別嘅品牌，若集齊開拓市場力量將大好多。最近以總商會名義開設嘅網上商店，有齊珠寶鐘錶、玩具同生活時尚等唔同產品，推廣效果唔錯。
