喺早前法會表決政改方案一役,建制派WhatsApp群組內容外洩,自此一班議員對用WhatsApp群組都有啲戒心。但泛民尋日中午同立法會內務委員會主席梁君彥及財務委員會主席陳健波會面時,討論到點樣向泛民傳達內委會同財委會事宜。泛民就提議同陳健波開設WhatsApp群組,方便溝通,陳健波就笑言,希望唔會外洩對話。唔知佢係咪怕泛民都好似建制派咁洩露對話內容呢?

陳健波擔心用WhatsApp群組同泛民議員溝通,對話內容會外洩。

陳健波又話佢喺會上承諾會跟從議事規則開會,但若有人利用灰色地帶,佢就需要處理。佢亦會檢視政府要求財委會通過撥款嘅時間表,唔會貿然全盤接收。佢更提出可以出席每次泛民會議,但泛民就反建議開設WhatsApp群組溝通就可以。泛民會議召集人何秀蘭就承諾,唔會公開對話。

而梁君彥就話依家內委會副主席唔係泛民議員擔任,但若果佢每周同政務司司長例行會面後有特別事情,會直接向何秀蘭交代。何秀蘭就表明對呢個安排唔滿意,重申「交代」唔能夠取代泛民議員直接同司長會面,但佢稱泛民唔會主動要求同政府溝通,聲言要睇政府係咪願意先主動提出溝通。

第一手消息請下載on.cc東網iPhone/iPad/Android/Windows Phone Apps