政壇：海洋公園大震盪 苗樂文唔做CEO
海洋公園高層大震盪！海洋公園尋日發新聞稿，指擔任海洋公園行政總裁近十二年嘅苗樂文（Tom Mehrmann），近日稱將喺今次合約屆滿後唔再續約，並喺明年八月一日離職。苗樂文提前幾個月知會公園有關意向，以便公園有時間招聘新行政總裁，確保領導層可順利交接。
苗樂文（左）明年八月一日離職。
海洋公園董事局同園方曾挽留苗樂文，但最終尊重佢嘅決定，並感謝佢喺過去多年嚟嘅領導同貢獻。董事局經已就行政總裁嘅繼任人展開全球招聘嘅程序。
海洋公園透露，○四年二月加入海洋公園嘅苗樂文喺致主席同董事局嘅信中，指公園已訂出未來十年嘅長遠發展策劃，基建改善工程即將完成、水上樂園設計同發展資金已經就緒，酒店項目完成投標審批，港鐵南港島線通車指日可待，用以發展日後主要項目嘅資金亦已安排妥當，認為公園管理層能精益求精。
