尋日立法會復會，繼續辯論兩項由議員提出引用《立法會（權力及特權）條例》調查鉛水事件的動議，結果一如所料，兩項議案都喺建制派反對下被否決。但最意料之外嘅係，發言向來平淡如水嘅政務司司長林鄭月娥，突然喺總結時「大爆發」，怒斥泛民誇大鉛水事件同提出好多不合理嘅要求，又指議員要官員當眾飲鉛水係一種「屈辱」，自言「官到無求膽自大」，唔怕公開同泛民開火喎。

其實鉛水醜聞確係因政府監管不力而引發，令大量基層公屋居民飲用多年鉛水而不自知，林鄭仲講啲咁刻薄嘅風涼話，難怪被議員寸佢「膽生毛但冇心肝」嘞！

林鄭就鉛水醜聞公然護短已經唔係第一次，佢早前出席立法會內務委員會特別會議時，僅承認政府對公屋食水含鉛問題「認知不足、制度不足」，但睇唔到有個別官員須為事件負責，已經惹嚟各方批評。到尋日嘅立法會特權法辯論，除咗多名「逢政府必反」嘅泛民議員，一直為政府「保駕護航」嘅多名建制派議員亦狠批政府喺鉛水醜聞中嘅表現。

「認知不足」圖蒙混

其中廠商會代表林大輝指出，香港作為國際文明大都會，出現鉛水問題是「匪夷所思」，反映政府危機處理不足，管治能力出問題，而林鄭嘅「認知不足」論，更加係企圖蒙混過關、推卸責任，令高官問責制蕩然無存。就連建制派第一黨建仔嘅主席譚耀宗亦批評政府對鉛水事件處理混亂。

不過，林鄭總結發言時不但無就政府監管承建商不力致歉，仲反過來炮轟議員。佢質疑鉛水問題已變得「泛政治化」，批評泛民誇大問題，動輒就話「飲毒水、中鉛毒」，提出全邨驗水、全民驗血等過分同唔合理嘅要求。佢又提到曾有兩位官員落區時被議員威逼飲鉛水，認為係一種屈辱，佢已經喺政府內部發指示禁止官員再次咁做，以維護個人同特區政府嘅尊嚴喎。最後佢仲以「人到無求品自高」、「官到無求膽自大」嚟形容自己，聲言唔怕因為反擊議員而被人批評。

議員怒斥冇心肝

林鄭嘅言論一出，令社會各界議論紛紛，有網民更將電影劇照改圖惡搞，批評林鄭「你好大嘅官威呀！」立法會內，首先揭發鉛水事件嘅議員黃碧雲，就狠批林鄭言論具挑釁性，企圖轉移視線、卸責護短，仲強調如果要官員飲一、兩啖鉛水就係「屈辱」，咁成千上萬無辜飲咗幾年鉛水嘅居民又點計數？佢形容林鄭今次唔單止係「膽大」，而係「膽生毛」同「冇心肝」。

第一手消息請下載on.cc東網iPhone/iPad/Android/Windows Phone Apps