好多議員喺立法會開會發言時爆金句,有啲擺明係博出位兼曝光嘅,但有啲就係蝦碌嚟嘅,甚至有啲議員將蝦碌變成自創添,而近期「樹根化」更有蔓延趨勢。

話說議員鍾樹根屢次自創成語或詞語,代表作有「子烏虛有」、「明張目膽」、「雞毛鴨蒜」同「悔辱」等,成為金句被市民引用或網民惡搞。上周學聯率先被傳染,將「唇亡齒寒」寫為「唇寒齒亡」印喺宣傳品上,點知尋日輪到鍾樹根黨友「譚Sir」譚耀宗出事,創出「十年怕草『蠅』」,結果被其他議員恥笑!

斥泛民「潑污水」

立法會尋日朝早續會,辯論係咪引用《立法會(權力及特權)條例》調查鉛水事件。譚Sir話目前已有三項調查工作進行中,所以現階段毋須引用特權法呢把「尚方寶劍」。佢又批評泛民主派以橫額等形式抹黑,唔單止「抽水」,更加係「潑污水」!佢仲激動到話唔希望「一朝被蛇咬,十年怕草『蠅』(繩)」嘅情況。

「長毛」梁國雄一聽到就發現有問題,譚Sir亦受擾稍作停頓,但係仍然未發現自己講錯,竟然再次重複上句一次。長毛等待譚Sir完成發言之後,就要求澄清到底係「蠅」定係「繩」,即蒼蠅定草繩?其後發言嘅「慢必」陳志全亦指出譚Sir可能「睇錯稿」,仲即場解釋原句嘅意思。

其實,除咗譚Sir「甩轆」之外,議員「卿姐」劉慧卿亦噏錯工業界議員林大輝係湖南政協,大輝聽到就即時澄清自己係全國政協委員兼河南省政協委員。喺大輝澄清後,卿姐都公道即場道歉,話唔知道大輝幾時升咗級喎。

第一手消息請下載on.cc東網iPhone/iPad/Android/Windows Phone Apps