二十一世紀係科技時代，發展一日千里，除咗為人類帶來方便，亦令生活質素不斷提高。可惜嘅係，港府好似一部陳舊機器咁，唔淨止冇與時並進，仲阻礙科技發展，搞到爭議四起，添煩添亂。

嗱，警方早前高調打擊手機應用程式召車服務公司Uber（優步），引起唔少爭議，白牌車問題再次令人關注。運輸及房屋局局長張炳良尋日補鑊，話當局對有關租車服務模式持開放態度，但經營平台必須合法同領牌喎。佢仲話，當局會因應社會需求，改良的士服務，包括考慮引入優質房車式的士服務，希望喺年底展開公眾諮詢咁話。

早知今日，何必當初。如果港產官僚唔係後知後覺，及早對相關租車服務作出規管，就唔使搞到今日咁狼狽喇。講真，隨着互聯網日漸普及，手機程式租車服務大行其道，唔止市場有需求，而且係世界趨勢，港府唔盡快檢討法例，一味頭痛醫頭，被動應付，唔搞到一鑊粥至奇喇。

其實，要規管手機程式租車服務唔係咁難嘅啫，上海早前就宣布為「滴滴快的」發放專營證書，將叫車平台納入監管，制訂多項管制措施，包括經營者必須購買第三方保險及承運人保險，以及為司機進行專職培訓等等，既為市民提供更多選擇，又可以引導行業良性競爭。點解人哋做得到，香港做唔到呢？

所以話，今時今日急需改善嘅唔止係的士服務，仲有港產官僚嘅因循作風。係人都知，手機程式租車服務唔係新鮮事物，法律上存在灰色地帶亦係公認嘅事實，過去兩年曾經喺歐美等地引起巨大爭議，甚至觸發暴力抗議添。如果港產官僚真係「適度有為」，Uber進軍香港時就應該睇到問題所在，及早拆彈，而唔係翹埋雙手乜都唔做喇。

事實證明，港府口口聲聲發展創新科技，純粹係大隻講，連咁簡單嘅手機程式租車服務都搞唔掂，仲有乜資格講推動創新科技吖。好笑嘅係，投資推廣署今年初至喺網頁極力推崇Uber，點知幾個月後警方就放蛇拉司機，官僚自打嘴巴事小，引起市場混亂事大。

講到底，有需求就有市場。手機程式租車服務成行成市，係咪反映市場有需求呢？法例應該點樣與時並進呢？呢啲都係要正視嘅問題，港產官僚繼續扮鴕鳥，盞引起更大爭議嘅咋，叮！