城中鏡：名媛「心蓮心」 保護家暴婦

近年家庭暴力個案趨升，為提供更多支援畀遇到家庭問題嘅弱勢婦女同小孩，李錦記執董李惠雄太太Mahnaz Lee同Adler珠寶董事總經理Patti何彭慧嫻五年前創辦咗組織「心蓮心」，Patti仲透露，好多婦女遇到家暴都好無助，有個案係一個媽媽與兩歲嘅囡囡喺港鐵站流連唔敢返屋企，女孩一聽到列車廣播目的地，已驚到震晒同忍唔住喊，最後由心蓮心幫手搵臨時居所。另外，佢哋又開辦一啲插花、烹飪、整月餅嘅課堂，同時做心理輔導，等遇到家暴嘅婦女有藉口同家人解釋去咗邊。