有「海產大王」之稱嘅中華總商會永遠名譽會長蔡冠深尋日獲加拿大阿爾伯塔大學頒授榮譽法學博士,典禮喺加拿大駐港領事官邸舉行。蔡冠深話呢個係佢第五個榮譽博士學位,但佢就話自己六七年起已投資加國,近五十年後先獲頒博士實在太遲,又話希望利用自己喺兩地嘅網絡,加強中加關係。

蔡冠深(左二)獲榮譽法學博士銜,太太蔡關穎琴(右二)、兒子雋思同女兒頌思出席支持。

陳曦齡(右)同老公謝德富醫生到場恭賀蔡冠深。

郭少明話唔會用銀行保險箱,聲言唔驚屋企被賊人爆竊。

日前滙豐銀行副主席兼行政總裁王冬勝嘅「大班屋」被爆竊,被竊匪掠去名錶及珠寶。同樣住山頂嘅蔡冠深就話冇有怕,事關佢屋企每年有保安檢查,更重要嘅係佢有個好醒目工人,早幾年曾有賊入屋,因工人大叫嚇走個賊而力保不失,所以佢未驚過喎。

雖然保安工夫做足,但佢都試過被爆竊,佢同太太十幾年前將父母嘅金器放喺舂坎角嘅別墅,點知就被賊人全部偷走,但佢仲識講笑話:「放喺佢(賊仔)度又係放,放喺我度又係放,無所謂啦!」

陳曦齡保安貼士「唔買嘢」

出席支持蔡冠深嘅維特健靈董事長Helen陳曦齡醫生,十幾年前都試過被爆竊,深水灣別墅曾經被賊人光顧,但入面只有一對萬幾元嘅耳環,損失都唔大。至於有乜保安貼士,佢話最重要就唔好買咁多嘢,就無嘢可以被人偷啦!

同樣試過被爆竊嘅仲有莎莎主席郭少明,佢話唔會因為怕咗啲賊仔,而轉用銀行保險箱存放金飾同名錶,「放咗去保險箱咪等於長期唔可以戴,咁無樂趣」。至於佢會否好似Helen咁買少啲嘢,佢就話「咁同叫我唔好賺錢一樣」,認真豪氣。

第一手消息請下載on.cc東網iPhone/iPad/Android/Windows Phone Apps