政壇：搞搞政：建制派贏仗照甩轆 易志明烏龍漏報名

據了解，建制派內部早已協調由易志明頂替劉皇發做發展事務委員會副主席，但協調當日易志明唔喺香港。直至上周六各委員會截止報名，先有人發現佢根本無報名加入相關委員會。點解無報名呢？易志明解釋自己參加開經濟發展事務委員會，無諗過會加入發展事務委員會，既然如今米已成炊，佢樂於接受挑戰同努力溫書迎戰工務小組工作。至於主席就如無意外由工程界議員盧偉國擔任。

葉劉 一舊雲 互辣

至於人事編制小組委員會正、副主席位，亦一如所料由新民黨葉劉淑儀同工聯會黃國健包辦，但會上仍然火花四濺。

話說喺提名正、副主席人選後，白鴿黨嘅「一舊雲」黃碧雲突然要求主席候選人發表政綱，葉劉隨即發炮指一舊雲有誤會，因為係選舉法定委員會主席，唔係立法會直選，毋須交代政綱。葉劉話做主席最重要有效率同正直不阿，唔需要政治化嘅政綱。但一舊雲心生不忿，批評葉劉「一句大過嚟」，質疑對方暗示佢「唔識嘢」，又不滿對方態度傲慢。葉劉亦不甘示弱，指一舊雲堂堂博士竟然歪曲佢嘅說話，議員發言唔應該係如此水平，跟住仲補多句，如果一舊雲想知道佢嘅政綱，可以去新民黨網頁睇睇喎。