政壇：「未有女友點生仔」董清世妙談分拆

信義玻璃CEO兼信義光能副主席董清世尋日話「未有女朋友，點生個仔出嚟呀？」嗱，佢唔係講自己，咁查實係講緊邊個？

話說「阿媽」信義玻璃拆完又拆，一三年分拆咗「阿仔」信義光能出嚟，「阿媽」依家又準備拆香港汽車玻璃業務上市。於是有人問，「阿仔」信義光能又有冇考慮分拆旗下嘅信義能源出嚟呢？董清世真盞鬼，答咗文首句話，即係依家講分拆言之尚早咁解。

話時話，信義玻璃同信義光能呢對母子，分工不嬲好分明。但舊年「阿媽」話要搞埋風能，唔通想撈過界，撈埋「阿仔」新能源個瓣？董解畫，其實係想信義光能專注做太陽能咁話。