政壇：EQ出「B」 劣評立會餵哺間
其實立法會間唔中都有學生參觀，但就罕逢「B蹤」。近日，竟有個幾個月大嘅BB入侵立法會議員EQ葛珮帆辦公室！原來EQ嘅助理Angel因屋企裝修，被迫要帶埋五個月大嘅BB沛霖返工。EQ唔止勁歡迎，仲幫BB改咗個乳名叫「包包」，事關BB面仔圓圓好可愛。不過，玩人哋個BB就開心，自己生就要負好大責任，所以EQ都決定咗唔生，將愛心分畀全部小朋友。
葛珮帆（左）容許助理Angel（右）喺屋企裝修期間帶埋BB返工。
衞生欠佳 冇簾遮掩
受大力推廣母乳餵哺嘅EQ影響，Angel今胎都選擇母乳餵哺，但佢發現立法會對母乳餵哺支援不足，雖有母乳餵哺間，但衞生環境欠佳、無插頭又無冷氣，仲冇簾遮掩，餵奶時要同其他媽媽「你眼望我眼」。EQ早前就去信秘書處反映，但八月至今都只係改善咗衞生情況，佢希望立法會可盡快改善母乳餵哺間環境，而改善前佢就要借自己辦公室畀Angel餵母乳，認真唔話得。
