政壇：莫乃光買定底褲 送給失「副」單雞
咦！立法會內竟然有一對隱形「HeHe」（男同性戀者）？白鴿黨「單雞」單仲偕尋日爆料，資訊科技界議員莫乃光早前送咗一條名牌內褲畀佢，但內衣褲呢啲貼身衣物一般都只會送畀親密伴侶，佢哋嘅舉動不禁惹人遐想。實情係莫乃光有先見之明，一早預咗單雞選唔到內務委員會副主席（內副），所以就一早買定條名牌「內褲」準備送畀單雞，當係安慰獎喎。
單仲偕（左）做唔到「內副」，莫乃光（右）就送條名牌內褲安慰佢。
莫乃光話條名牌內褲要成三百幾元，係佢平日着嘅內褲價錢十倍，因為一早預咗單雞無得做「內副」，所以上星期已預早叫同事買定。嘩，內褲都要同事買，唔係嘛？收到禮物嘅單雞就心情大好，仲大爆自己嘅尺碼，但咪諗歪隔籬，佢講緊自己腰圍三十二吋咋！但單雞話莫乃光買貴咗，佢平日喺特賣場買，只係六折價錢。
至於今次可能被人誤會佢哋係「HeHe」關係，單雞話一早同老婆講咗莫乃光會送內褲畀自己，雖然老婆反應冷淡，但就唔怕老婆唔鍾意喇！佢暫時將內褲放喺立法會辦公室，為表誠意，星期五會試着，到底莫乃光送嘅內褲係咪特別好着，佢話屆時會話畀大家知喎！
