未入正題前，太一叮想同大家講個壞消息先：強積金已經連續五個月出現虧蝕，每名打工仔上月平均蝕咗三千七百元，真係肉都赤埋，直頭「強蝕金」喇。咁蝕法，容乜易到退休嗰陣連渣都冇得剩0架？

大家睇到喇，強積金制度千瘡百孔，打工仔旨意呢筆錢退休喎，隨時臨老唔過得世，所以話啫，推行全民退保真係刻不容緩0架。政務司司長林鄭月娥話喎，年底將會就退休保障問題作公開諮詢，到時會有唔同方案畀市民發表意見。

唔通港府知衰轉死性？係就好咯。不過咪開心得太早，事關林鄭月娥話鋒一轉，話政府對推行全民退保有好大保留，因為從公共財政可持續性、分配公共資源嘅平等性同埋港府嘅福利理念等，全民退保都唔符合喎。咁即係點？即係港府有預設立場，所謂諮詢只係敷衍民意，走過場嘅咋。

冇冤枉港府0架。嗱，扶貧委員會呢頭公布全港九十七萬名長者中，三十萬活在貧窮線下，即係三個長者一個貧窮，林鄭月娥嗰頭就自打嘴巴，話呢三十萬貧窮長者入面，有一半唔需要經濟援助喎。當局條數係咁計嘅，因為「貧窮線」只計算收入，唔計算資產，長者退休後雖然無收入，但唔少長者都有自置物業，係「低收入、高資產」一族喎。

講嚟講去，港府係都要縮骨，有意實行資產審查制。咁就好笑嘞，好多打工仔捱足一世為層樓，無非諗住老來有片瓦遮頭，居然咁都成為「原罪」，好可能被剝奪退保嘅資格。港府即係要一班老人家賣咗層樓瞓街養老啫，有冇再涼薄啲呀？

真係諗極唔明，老有所依，老有所養，係咪真係咁難做到呢？港府係咪要咁算死草呢？全民退保大大話話討論咗十幾年，社會早就達成共識，港府早前委託港大學者周永新團隊撰寫嘅研究報告亦發表咗一年有多，港府家陣反轉豬肚又話要諮詢，其實無非拖字訣，所謂推動全民退保有幾多誠意，唔使問都知。

問心嗰句，港府肥到連襪都着唔落，財政儲備高達八千億元，偏偏善財難捨，錙銖必較，全民退保係咁，自願醫保又係咁，推得就推，卸得就卸，之但係高官加人工又唔見港府托手（月爭），呢啲咪叫無良囉。咪話太一叮唔提醒，港府繼續對全民退保死拖爛拖，製造民怨，隨時激到老人家上街佔領吖，叮！