城中鏡：退休樂享「三冇」
好多名人退休後仲忙過以前，仍要請私人秘書去打點每日嘅行程。早前喺一個慈善晚宴上見到滙豐私人銀行亞洲區前行政總裁Monica王以智，佢自爆依家嘅退休生活「冇秘書、冇工人、冇司機」，不過佢當然唔係畀唔起，只係覺得唔需要，但屋企冇工人，唔通佢自己吸塵、洗碗？答案係佢會請鐘點工人做清潔，出入就以的士代步。
馮潔瑩（中）同Vidhi Tambiah（右）合辦慈善晚宴，獲王以智（左）現身撐場。
馬清揚歡迎香港舉辦電動方程式賽事。
龍菁希望籌款幫助降低內地農村新生嬰兒死亡率。
雖然話退咗休，Monica仍然好多應酬，經常出席慈善派對。無論幾忙都好，跳舞始終係佢生命中最重要嘅事，佢自爆依家一星期至少跳六天，每天跳兩小時，另加一小時運動，認真唔講得笑。
帶靚酒拍賣籌款助內地嬰
講番當日晚宴，其實係由知名嘅葡萄酒俱樂部The Wine Forum，聯同國際級酒櫃公司SENSIS合辦，其中The Wine Forum聯席創辦人Vidhi Tambiah同SENSIS總經理Agnes馮潔瑩一早到場招呼賓客。Agnes話當晚出席嘅嘉賓親自帶靚酒參加拍賣，所得善款將捐助兒童醫健基金會，用喺幫助內地偏遠農村嘅新生嬰兒。
東華三院總理Philip馬清揚、兒童醫健基金會聯合主席龍菁等人都有到場。對於香港明年將舉辦電動方程式賽事，熱愛賽車嘅Philip話係好嘅開始，因為內地、澳門等鄰近城市都已有賽車，至於佢會唔會落場參賽，佢笑笑口話都會考慮喎。
