政壇：降參選年齡被寸 黃之鋒照申法援
尋日十九歲生日嘅學民思潮召集人黃之鋒，前日入稟高等法院申請司法覆核，要求將立法會選舉參選人年齡限制由二十一歲降低至十八歲，直認如勝訴會考慮參加明年立法會選舉，署理特首林鄭月娥首次開腔指，過去一段相當長嘅時間，都聽唔到社會上有很強烈訴求，要將參選年齡降低至十八歲，明顯寸爆黃之鋒提出嘅似乎係個人意見居多。
黃之鋒
黃之鋒就今次司法覆核，前赴法援署領取申請籌號。 （黃之鋒fb圖片）
林鄭尋日出席行政會議前，被問及黃之鋒提出降低年齡限制嘅司法覆核時，起初指事件已進入司法程序，唔會表達政府立場，但其後亦有作出補充，包括即使有很強烈嘅公眾訴求，能否及時修例等事宜，全部都屬於未知之數。
黃之鋒雖然被寸同潑冷水，但照舊就今次司法覆核申請法援，主動喺社交網站上載一張喺法援署取得嘅申請籌號，似乎不論外界有幾多質疑同批評，佢都唔會「停一停，諗一諗」，納稅人要有心理準備為佢鋪路參選「埋單」嘞！
