基層苦無安樂窩 惟有圍瞓禮賓府

呢嗱，日前有逾百名基層巿民包括露宿者、居住劏房及工廈等人士，喺禮賓府外「圍瞓」抗議，促當局增建房屋、重訂租務管制以及改善基層住屋等情況。話時話，依家秋風起，天氣涼，見到班基層市民餐風宿露，真係睇見都心酸。

有人可能問，香港有公屋嘛，當局拍心口承諾三年上樓添，因乜解究要瞓街咁淒涼啫。冇計啦，正所謂政府靠得住，豬乸會上樹。公屋輪候冊人數不斷飆升，整體申請者高達二十八萬，所謂三年上樓承諾，完全係大隻講。

唔係誇張，莫講話三年啦，唔少四至六人家庭輪候七年都未上到樓，至於十二萬非長者單身申請人，好多仲係年輕人添，由於每年只係獲得當局撥出二千個單位分配，怕且等到頭髮白至上到樓。

當然啦，市民唔想等到頸都長都有辦法嘅。呢嗱，近年唔少人唔理好醜，最緊要就手，連「凶宅」單位都搶呀。早排特快公屋編配計劃推出一千二百個單位招租，竟然收到多達八萬幾份合資格申請書，超額申請七十三倍，創下近年新高。連「凶宅」單位都爭崩頭，證明無得住慘過見鬼。

有頭髮邊個想做瘌痢吖，愈來愈多市民買唔起私樓，捱唔起天價租金，依家連「凶宅」都輪唔到，迫不得已淪落到住劏房甚至瞓街。據資料顯示，全港有十九萬五千五百人住喺分間樓宇單位，遠超二○一一年嘅六萬五千人，你就知道房屋問題有幾嚴重呢。

講到尾，房屋問題持續惡化，港府責無旁貸，固然抵鬧，講句公道話，家陣港府唔係唔想加快建屋，最弊係有啲人阻頭阻勢唔畀發展土地，郁吓就提出司法覆核，呢度唔准發展，嗰度唔畀起樓，搞到港府綁手綁腳，有地都用唔到。

好嘞，拓土寸步難行，租金自然狂升啦，最後都係基層市民受苦。所以呢，冤有頭債有主，與其「圍瞓」禮賓府，不如「圍瞓」呢班罪魁禍首嘅屋企啦。計太一叮話齋，當局再唔諗辦法幫吓廣大無殼蝸牛，依家就「圍瞓」啫，因住遲早變佔領運動呀，叮！