香港潮屬社團總會(總會)早前一連多日喺中環遮打花園舉辦「香港潮州節」,一班潮州「家己冷」趁住呢個活動聚首一堂,其中總會常務會董張俊勇透露由以往好鍾意食潮州牛丸,到近年完全無食牛肉嘅經過,另有人則憶及細個唔識食部分潮州美食,反而長大後見到就流晒口水。

張俊勇指多年前開始唔食牛肉,並開始戒食紅肉。

林宣亮透露辦潮州節活動前,二十多人特別去潮汕試食。

黃進達(左起)、葉振南同陳光明齊現身支持潮州節。

張俊勇出席活動後話自從三年前返內地食和牛時,突然感覺到隻牛好似喊緊,之後就完全無食牛肉,依家連紅肉都戒緊。佢又話以前面部經常泛紅,自從無食牛肉後,情況得以改善,笑言皮膚仲好過太太添!

張俊勇自爆一屋女人

當問及潮州男人予人印象係「大男人」,張俊勇話呢個係外界普遍嘅誤解,又以自己為例,屋企以往都係由嫲嫲話事,加上佢依家屋企有兩個女同兩名女傭,名副其實係一屋女人喎。

總會嘅財務部主任林宣亮透露籌辦今次活動不為人知嘅一面,原因佢哋一行二十多人事前特意去潮汕試食,揀選標準以衞生及特色為主。佢又認為潮州話都有獨特之處,好似潮州話女人嘅讀音係「美姿娘」,畀人嘅感覺比較溫柔。

同場仲有汕頭商會會長葉振南、總會會董陳光明同康泰旅行社董事總經理黃進達。對於最近一名少女因等唔到合適肺臟移植離逝,黃進達自言好支持器官捐贈,亦知道身邊好多年輕朋友都填咗器官捐贈卡,強調要小心向家中長輩交代,始終年輕人同長輩嘅思想有啲唔同。另一總會成員林月萍亦填好晒器官捐贈表格,希望可以幫到有需要嘅人。

第一手消息請下載on.cc東網iPhone/iPad/Android/Windows Phone Apps