政壇：反對廢對沖機制 林健鋒咬牙切齒
建制派喺年中政改表決甩轆嘅後遺症陸續浮現，其中帶頭拉隊離場嘅建制派「班長」葉國謙率先被罰無得參選新一屆區議會選舉，連帶明年無得循區會第一界別進入立法會「玩完」，外界關注同樣帶頭離場嘅商界議員林健鋒，會否步葉國謙後塵無得連任立會議席，林健鋒對此無正面回應，反而聯同工業界議員梁君彥硬銷所屬工商政團，至今已獲得七大商會、加上另外七名建制議員支持，齊齊反對取消強積金對沖制度。
林健鋒（左）同梁君彥反對取消強積金對沖制度。
取消強積金對沖與否，成為勞資雙方嘅新戰場，林健鋒同梁君彥尋日同傳媒茶敍時，談及強積金對沖一事咬牙切齒，其中後者指商界必須先擺姿態，一旦政府提出方案，定必同政府「你死我活」，但佢同時預料，今屆政府就此修改法例機會好微，表明唔希望政府拋出一個具爭議方案，令商界同勞工界分裂。
當問及政府一旦提出取消強積金對沖方案，會否為此辭去行政會議成員職務，林健鋒以猜測性問題為由不作回應。話時話，林健鋒等人如此表態，令人懷疑佢哋所屬工商政團喺反對行動會否「雷聲大，雨點小」收場。
