政壇：曾浩輝 梁卓偉 音樂結緣
前衞生防護中心總監曾浩輝同港大醫學院院長梁卓偉，呢兩位醫學界嘅著名鑽石王老五，原來喺十年前有過一段緣！曾浩輝尋日出席一項活動時透露，下個月會喺一場慈善音樂表現彈鋼琴，期間佢自爆十年前原來曾經同梁卓偉一齊表演「四手聯奏」，但笑言當年彈到「走晒音」，失禮死人。唔知當時佢係因為啲乜而無法專心，搞到走晒音呢？
曾浩輝（右）自爆同梁卓偉（左）十年前曾經一同「四手聯奏」彈鋼琴。 （資料圖片）
曾浩輝自辭任衞生防護中心總監後，一直冇做任何全職工作，無官一身輕。佢自言退休後好清閒，有時教吓書、有時讀吓書，最新又考咗一個皮膚科文憑，但正因為太多時間炒股票，最後炒燶咗，搞到自己「三級燒傷」喎。不過，佢仲有閒錢一年去成四、五次日本玩，至於同乜嘢人一同遊日，佢就三緘其口嘞！為免讀者誤會，曾浩輝講過佢有女朋友嘅！
