金融管理局總裁「攞命陳」Norman陳德霖捲入洗黑錢疑雲!立法會會計界議員Kenneth梁繼昌喺社交網站爆料,指自己尋日同攞命陳會面時,攞命陳自爆早前喺某銀行有個戶口,因為存款唔多又長期冇交易,畀銀行懷疑「可能會被利用洗黑錢」,要求攞命陳提供入息同財富證明,否則就要終止其戶口,攞命陳惟有急急向銀行解畫。Kenneth笑言,事件說明香港銀行監管制度一流,貴為金管局總裁亦不能「超然亅!

攞命陳自爆瘀事,起因係Kenneth同佢講開自己與女兒嘅遭遇。事緣Kenneth三個月前想同女兒開番個聯名户口,等女兒喺英國寄宿時攞零用錢會方便啲,點知呢間同佢往來咗二十多年嘅銀行,竟然話Kenneth依家係屬於PEP,即politically exposed person(暴露於政治的人士),銀行「睇得好緊」,隨時要審查幾個月先開到戶。好彩Kenneth個女其實夠年齡自己開獨立嘅學生戶口,佢哋先唔使等足幾個月。

少數族裔開戶被刁難

其實Kenneth今次同攞命陳會面,主要係想向對方反映喺國際加強打擊洗黑錢活動下,有好多少數族裔人士同海外非政府組織,喺香港銀行開戶口都遇到不必要刁難,希望有關銀行喺執行法規時多用常識,唔好矯枉過正,攞命陳就承諾會跟進有關問題。講多句,Kenneth同攞命陳原來係中學校友,唔怪得之咁好傾喇!

第一手消息請下載on.cc東網iPhone/iPad/Android/Windows Phone Apps