單車節烏龍百出 旅發局人頭豬腦
英國一場馬拉松賽事曾經出現世紀甩轆，話說主辦方臨時通知更改賽道，點知只有跑第一嗰個跟得上引路電單車，其餘五千人全部跑錯方向，就係咁，成就咗馬拉松史上唯一嘅「獨贏」。
不過千祈咪笑人哋喎，香港都唔好得幾多嘅咋。由旅發局主辦、一連兩日嘅單車節尋日結束，可惜一啲都唔圓滿，而係甩漏多多，烏龍百出。好似三十五公里比賽咁，一起步就塞車都算嘞，車手臨衝線時先至發現，撞啱十公里賽事起步，結果焗住呆等，大為掃興。咁都未算絕，兒童組參賽者要等成粒鐘至出發，完成賽事又冇工作人員提場，搞到要喺條街度係咁兜圈。部分賽事更加連選手邊度集合、邊度攞車、邊度還車都指示不清，大會熱線電話又長期打唔通，總之就亂過亂世佳人啦。
其實唔單止參賽者一肚火，市民同駕駛人士一樣怨聲載道。有網民鬧爆，由機場搭巴士出市區，站頭冇提醒有封路措施，結果足足塞咗個半鐘；其中重災區嘅汀九橋，車龍一度延伸至屯門公路，部分司機喺高速公路上掉頭，睇見都牙煙。你哋話嘞，本來開開心心嘅盛事，家陣淪為人人喊打嘅憾事，有人話主辦方「腦閉塞」，一啲都冇鬧錯o架！
真係諗極都唔明，單車節原訂舊年舉行，後來因為佔中而延遲至今，照計有大把時間籌備，點解結果都係倒瀉籮蟹呢？再講吖，鬧市舉行體育活動，一年一度嘅國際馬拉松就係成功例子，珠玉在前，旅發局硬係唔識取經，唔搞到一鑊泡至奇喇。
講開又講，旅發局撞板多過食飯，都唔係咩新聞咯。早排佢哋豪花八千萬元推銷香港旅遊，結果旅客不增反減，佢哋日前又宣布斥資一千萬元，話要設立旅遊配對基金喎。不過嘥氣啦，淨係睇吓旅發局嘅官方網頁，更新仲慢過烏龜，試過有旅客按圖索驥，專誠幫襯網頁推介嘅食肆，去到至發現原來已經改換門庭；至於其他推介食肆，裝修有之，價錢不符有之，有啲甚至已經摺埋，旅客聽佢老點，盞乘興而來，敗興而歸。計太一叮話齋，旅發局發展旅遊業就冇嘞，靠害就有份，不如索性改名「旅殺局」好過喇。
唉，香港愈來愈排外，愈來愈政治化，「動亂之都」惡名遠揚，旅客已經避之則吉，再加埋旅發局添煩添亂，想唔拍烏蠅都幾難喇，叮！
