雖然話年齡係女人嘅秘密,但前港姐鄭文雅就唔介意公開自己已年屆五十五歲,保養得宜嘅佢擔任護脊大使,自爆用水喉膠通自療頸椎問題,果真係美貌與智慧並重。

鄭文雅分享獨家嘅護脊心得。

陳明恩(中)獲父母支持入娛圈。

鄭文雅尋日以「護脊大使」身份出席世界脊椎日活動,同場仲有「護脊之星」陳明恩,佢哋仲一齊帶領即場跳護脊操。其中鄭文雅透露成為大使五年,期間會到學校教導學生護脊知識。問佢有冇脊椎問題?佢話自己膊頭經常太緊,原來因為頸椎太直,佢話:「我用毛巾墊住水喉膠通,放喺背脊雞翼位置,瞓咗年幾就好好多。」再追問有冇叫老公幫佢按摩?佢就話:「冇喎,佢都要同我一齊瞓膠通。」

佢又喺台上分享護脊心得,大方透露自己已經五十五歲,問到唔介意公開年齡咩?佢笑說:「任何人喺網上都可以查到我幾歲,所以唔係秘密,而且我就係想話畀人聽,我都有番咁上下年紀,但唔代表脊椎一定有問題。」佢話自己有教高爾夫球、同時兼顧拍照及自己嘅陶瓷工作室,因此更加需要健康嘅體魄嚟工作。

陳明恩獲雙親撐場

同場嘅陳明恩就獲爸媽撐場,佢透露爸媽在港已三十九年,爸爸係傳教士,媽媽從事英語教學工作,依家教導非洲學生英文,陳笑言爸媽都十分支持佢入娛樂圈。

第一手消息請下載on.cc東網iPhone/iPad/Android/Windows Phone Apps