城中鏡：慧眼識傑青
新一屆傑青出爐！國際青年商會香港總會尋日公布「十大傑出青年選舉2015」選舉結果，近年積極宣揚素食概念的社企Green Monday聯合創辦人David楊大偉獲選為今屆傑青，但提名佢嘅竟然係開燒肉店嘅前傑青、叙福樓集團執董Simon黃傑龍。此外，臨床心理學家張依勵、眼科醫生李琬微同兒科醫生洪之韻等亦躋身傑青之列。
楊大偉（左）一腔熱誠感動黃傑龍（右）提名他當選傑青。
李琬微（右）獲老公余嘉龍同女兒捧場。
張依勵（左）同洪之韻齊齊獲選為傑青。
經營不同類型食肆嘅Simon坦言，佢同David本應係天敵，但David令佢體會到素食嘅重要性同社會多元文化，認為要接納社會上唔同立場同文化嘅人，於是連佢哋燒肉店都增設素食餐單畀客人選擇，認為呢個概念健康同值得鼓勵。David就話幾年前萌生推廣素食念頭時無諗過會有咁多人支持，強調每個人嘅一個小習慣，都可以幫助改變大環境問題，又勉勵年輕人有諗法不妨勇於實行。
輔導培訓回饋社會
張依勵舊年曾到西非利比里亞參與為伊波拉病人同家屬而設嘅心理輔導工作，並喺當地電台提供輔導節目。佢認為香港人嘅心理健康狀況唔及發展中國家，因社會低層承受嘅壓力好大，盼未來可以做更多相關輔導工作回饋社會。
對於現時本港有不少在職貧窮人士均擁有學位但仍難以脫貧，洪之韻認同人工的確令年輕人感到挫敗，但問題短期內難有改善，而香港嘅情況「比上不足比下有餘」，年輕人可挑選自己熱衷嘅工作，喺薪金以外搵到其他工作嘅滿足感。李琬微就話每年都有唔同界別人士當選傑青，佢哋會協助年輕人尋覓更多培訓機會，擴闊佢哋嘅社交網絡。
