政壇：搞搞政：鬍鬚曾借耶倫死撐
早前盛傳有機會喺下屆特首選舉「陪跑」嘅財爺「鬍鬚曾」曾俊華，為求上位頻頻大搞形象工程，點知早排玩出禍，忽然拋出敏感嘅樓市措施「減辣」論，除搞到特首梁振英要三度澄清政府唔會「減辣」，仲有傳北京驚鬍鬚曾變成地產商嘅棋子，「陪跑」機會迅即幻滅。未知鬍鬚曾係咪為求「翻盤」，尋日喺秘魯利馬參加國際貨幣基金組織同世界銀行年會時，竟借美國聯儲局主席耶倫過橋，為自己嘅「減辣」論補鑊。
曾俊華（左）昨日在秘魯利馬與耶倫（右）會面。（互聯網圖片）
鬍鬚曾尋日同耶倫會面時，除咗傾美國貨幣政策對主要新興市場嘅影響同全球經濟展望外，佢仲喺會面前率先喺網誌透露，將把握機會當面問耶倫有關美國嘅加息步伐。但大家咪天真以為鬍鬚曾係擔憂市民會受「息魔」殺到困擾，其實佢係為咗私利先真。
人肉錄音機 改口風出事
佢話知道耶倫一定唔會回答佢心目中想知道嘅答案，情況就好似記者成日問佢幾時調整針對樓市嘅措施，而佢多年嚟都只能引用「標準答案」，否則一旦改口風，隨時會被市場過分解讀，甚至造成不必要嘅震盪，故就算令記者失望，都只能做「人肉錄音機」，重複標準答案。既然佢知道「一旦改口風」會造成社會震盪，點解仲要冒險講「減辣」呢？結果言論隨即被炒作，搞出個大頭佛。
依家樓市只得零星樓價回落個案，鬍鬚曾就急不及待話要考慮「減辣」，即係想托市唔畀樓價跌啦，難怪被指係想討好地產商喇！再者，所謂嘅「標準答案」，同美國嗌加息一樣變咗「狼來了」，等同廢話，相信連耶倫自己都未必知道幾時可加息，最終鬍鬚曾亦只係得到個「標準答案」，咁問嚟作用何在呢？相信唯一作用就係為自己嘅「減辣」論死撐兼補鑊囉！
