政壇:陳正欣迎客 拒化繁就簡
為迎合內地遊客,城中好多旅遊服務同零售店舖都轉用簡體字。做鐘錶同時裝生意嘅保良局總理Daniel陳正欣就唔係好認同,佢話繁體字係香港特色,不宜改變,而且好多內地人都睇得明大部分繁體字,若要令內地旅客感賓至如歸,練好啲普通話比用簡體字更實際。
陳正欣唔撐以簡體字迎合內地客。
滿目簡體港失特色
Daniel話論字形,好多簡體同繁體字都好接近,故對內地人嚟講,繁體字未必會構成閱讀上嘅障礙,而佢識嘅內地朋友都唔會抗拒繁體字。佢認為除非涉及法律條文或合約,否則根本唔使用簡體字遷就佢哋。
況且,一旦香港舉目都係簡體字時,喺內地人眼中又仲有幾多香港特色可言呢?
佢又認為,如果內地遊客睇唔明某啲繁體字,港人可以用言語解釋。當然,要同內地人溝通無障礙,咁梗係要練得一口流利嘅普通話先啦!