政壇：返頭嫁搞公投 三大退聯兒戲
喺佔領行動之後，各大專院校爆出一場退聯風波，最後八大院校有四間都成功通過公投退出學聯。不過，香港大學、浸會大學同理工大學學生會尋日就忽然「返頭嫁」，夥同學聯召開記者會，公布有關喺各院校發起「大專修例公投」嘅安排。明明早前先同學聯劃清晒界線斷絕關係，依家又「藕斷絲連」一齊開記招，十足細路仔玩泥沙，好難捉摸。如果要搞大專修例公投，點解唔各自喺所屬大學搞呢？
研廢特首校監必然制
港大副校長人選風波餘波未了，學聯副秘書長黃嘉輝尋日宣布會聯同八間專上院校嘅學生會，包括港大、中文大學、科技大學、理大、浸大、嶺南大學、公開大學同教育學院，分別喺各院校搞「大專修例公投」。佢哋話依家大學條例係特首自動成為各大學嘅校監，同時有權委任校委會同校董會成員。佢哋認為條例會干預大學內政同學術自由，所以要求修改。
修改大學條例嘅方向有三，分別係廢除特首校監必然制、增加校董會同校委會校內人士嘅比例、增加學生校董等。大部分院校嘅學生會都話會喺各院校辦會員大會討論，盼年底前有共識，喺明年二月搞公投。浸大學生會會長陳思豪就話已成立修改條例專責小組，月底仲會同新上任嘅校長錢大康開會討論，議題包括學生校董嘅權力。但今次公投冇城大份，黃嘉輝就解釋因為早前城大學生會被倒閣，但有同城大學生會代表溝通，希望佢哋會加入公投。
港大學生會外務副會長李峰琦話依家就遴選副校風波一事徵詢法律意見，同埋會考慮提出司法覆核。佢仲話港大校委會主席梁智鴻任期將會屆滿，月底公投仲會針對校委會主席換屆一事，希望校委會主席會係學生、校友同教職員都接受嘅人選。此外，早前何君堯同陳曼琪獲委任成為嶺大校董，嶺大學生會會長劉振琳話會喺周四晚舉行大會討論事件，不排除會有任何抗爭行動。
