補習社刊登廣告，出價逾八千萬元力撬對家名師過檔，事件發展出人意外，以主角「霸氣」回應「多八千萬，於我無別」作結。

八千萬元「身價」，拍得住國際足球明星，不知羨煞多少打工仔女，而居然還「眼尾唔吼」，也算得上是天下奇聞矣。主角在聲明中還說，只要是一個公平、合理而且有共同理念的教學平台，他都願意留守。因理念一致而拒絕別家的甘辭厚幣，誠職場佳話也。當然了，天下熙熙，皆為利來，職場佳話得以實現，皆因整個行業足夠興旺。情況正如上世紀八十年代的港漫行業，一本薄裝漫畫閒閒地可以賣五、六萬本，搵錢真可謂「執豆咁執」，其時的當紅主筆，老闆極其厚待。一位現在仍然活躍畫壇的老行尊稱，當年可以帶成班手足踩上老闆屋企，索錢給成班手足落吧消遣，而且動輒逾萬元；更誇張的甚至為他出首期買樓。無他，街外錢搵唔晒，你不善待打得之人，自有識貨之人，況且出手闊綽一點，員工更賣命幫公司搵錢，除笨有精。

可以肯定，今時今日補習行業的含金量，比昔日的連環圖行業有過之而無不及，而天王拒絕過檔，表面上是「搵夠」，實際上也是顧及自身形象。雖云商業社會，人望高處，無可厚非，但在補習行業已徹底明星化的今天，天王建立飲水思源、不忘本的良好形象，長遠而言有利無害。