係人都知，侵權係刑事罪行，分分鐘監都有得坐，尤其涉嫌侵權嘅係政府部門，知法犯法咁就罪加一等咯。

話說位於赤柱嘅懲教署官員會所，雖有六十年歷史，但一啲都唔殘舊，內裏裝修豪華，設施一應俱全，簡直係五星級享受。特別係卡拉OK設施，由於收費低廉，以人頭計每小時十幾廿蚊就有交易，更加大受歡迎，經常其門如市。

不過咁，光棍佬教仔，便宜莫貪。有知情人士爆料，會所早前購入兩部分別載有逾萬首流行曲嘅卡拉OK機，部分歌曲懷疑未有向相關機構購買版權，期間曾使用有關卡拉OK機舉行歌唱比賽。即係話，冠軍歌手隨時以老翻名曲勝出都唔定，你話係咪搞笑吖。

根據香港《版權條例》，侵權行為屬於刑事罪行，後果可大可小，絕對唔講得笑。雖然醜聞被踢爆後，懲教署立即停用有關設施，但作為紀律部隊，居然毫無敏感度，搞到以身試法，會所淪為「老翻場所」，簡直匪夷所思。據講海關已就相關投訴進行調查，最怕又係官官相衞，不了了之咋。

即係咁，政府為高級懲教人員提供康樂場地，本來無可厚非，問題係，當中約二百七十名榮譽會員並非懲教署人員，咁就唔同講法喇。原來只要被視為對懲教署「有貢獻人士」，畀得起十二萬元會費，即可成為榮譽會員，名正言順享用呢啲五星級會所設施，你話係咪假公濟私吖。

有人可能會問，邊啲屬於「有貢獻人士」呢？懲教署發言人話喎，包括醫生、律師及會計師等，奇就奇在當中二百四十多名榮譽會員九七年或以前加入，懲教署完全冇交代佢哋有乜貢獻，唔怪得被人質疑變相「賣會籍」益權貴喇。

眾所周知，家陣房屋問題嚴重，無殼蝸牛望樓興嘆，港府一方面為「地從何來」發愁，甚至想「盲搶地」打郊野公園主意，另一方面任由私人會所霸佔大量土地，而且向權貴倒貼，連懲教署會所餐廳裝修費七百萬元都要市民公帑埋單，簡直係慷納稅人之慨，豈有此理！

唔使查通勝，消防處啱啱爆出涉嫌集體性侵同袍醜聞，懲教署會所又被揭懷疑侵權，今年紀律部隊肯定流年不利。不如懲教署試吓轉風水改運，將會所土地交番畀政府，用嚟拍賣起私人樓又好，起公屋又好，一家便宜兩家着，咁咪唔使再爆醜聞囉，叮！