政壇：趙振國善用數據抗寒冬
零售業步入寒冬，有「假髮大王」之稱嘅品牌總商會會長趙振國認為，香港曾經係聞名嘅購物天堂，但今時今日香港零售業喺價錢、服務質素等方面已失去競爭力，呢啲真係致命傷。曾經留學日本嘅趙振國係「日本通」，幾乎每月都要去一趟日本。佢話近年日本旅遊業谷底反彈，除咗因匯價跌令貨物變得相宜外，親切嘅服務文化亦係日本受歡迎嘅原因，將香港比下去。
趙振國認為香港應提升服務文化。
講到最近有官媒以八達通批評香港科技落後、發展停滯，趙振國認為，香港喺多方面確實未有與時並進，好似外國大企業早已利用大數據分析客戶嘅消費習慣，用以改善產品或服務，但香港業界喺呢方面顯得好落後。咁佢有冇應用大數據科技喺佢盤假髮生意呢？佢笑笑口話有喎，但詳情就要賣吓關子喇。
