有爆料話，香港大學校務委員會表決副校長任命前，校長馬斐森同特首梁振英（CY）曾經閉門會面，港大校友關注組召集人兼教育界立法會議員葉建源好似執到寶咁，大肆質疑CY與馬斐森會面係為咗副校任命事宜向港大施壓，炮轟干預院校自主，CY同港大尋日先後公開澄清，明摑葉建源一巴！但葉卻死撐佢哋冇講任命，都講咗大學內政喎，唔質疑呢樣，就質疑嗰樣，乜都講晒喇！

CY澄清，從冇干預過港大副校長任命事宜，並寸爆有關報道好唔具體，話佢與馬斐森喺校委會表決前數周（Weeks）會面，但又冇講到係幾個星期之前、十幾個星期之前、定係幾十個星期之前，而佢身為特首同多間本地大學嘅校監，與包括大學校長在內嘅不同界別人士會面係好正常嘅事。

港大嘅聲明則指，校委會主席梁智鴻同校長馬斐森與CY嘅會面中，從冇討論過副校長任命事宜，並暗批有人胡亂揣測同挑起不必要嘅誤會。

問番葉建源，佢死撐話唔知CY等人係咪講真話，又話雙方就算冇直接提及副校任命事宜，亦可能講過其他大學內政，進行政治干預同施壓，認為自己毋須為日前嘅嚴重指控澄清致歉。

講開港大，學生會主席馮敬恩爆料後，有多名校委、包括同馮敬恩一樣支持陳文敏升職嘅張祺忠都公開指正馮可能將部分委員嘅發言張冠李戴，或曲解咗佢哋嘅真正意思，有校委直指馮可能係英文差而引述錯誤。而馮至今都冇為自己「老屈」校委致歉或收回言論，咬完人又唔問責，同葉建源真係師兄弟！

第一手消息請下載on.cc東網iPhone/iPad/Android/Windows Phone Apps