政壇：議員高齡化 爭攞長者卡
香港人口老化嚴重，立法會亦唔例外，議員高齡化現象一年嚴重過一年，近日隨住新民黨嘅葉劉淑儀同田北辰相繼披露申領咗長者卡，大家先發現長者議員原來仲有好多，粗略統計最少有十四位議員年屆六十五歲或以上，功能界別同直選議員都有，佔咗七十個立法會議員中嘅兩成，唔知議會老齡化，可唔可以令安老政策同措施更完善呢？
平過自駕一大截
唔講唔知，葉劉淑儀、田北辰今年都踏入六十五歲，而葉劉則在符合資格冇耐就申領咗長者卡，起碼搭港鐵只需兩蚊，真係好抵。話口未完，原來佢嘅黨友田北辰都係啱啱攞長者卡。田二少話，唔少議員一夠年紀，都會申請長者卡享用優惠，睇吓好唔好用吖嘛！佢喺兩星期前申請長者卡，但點知佢張八達通同信用卡係同一張卡，銀行話要兩個月先改到資料，所以佢暫時未能享用兩元乘車優惠。
居於深水灣嘅田二少話，如果南港島線落成，以後兩元就可以去立法會，唔使駕車兜來兜去，認真方便！
早佢哋一步嘅係飲食界議員張宇人（Tommy），去年一夠六十五歲，已快快手申領長者八達通，依家都受惠於長者兩元乘車優惠，精打細算嘅Tommy話，有長者兩元乘車優惠及港鐵第二程九折優惠，佢來回大圍、旺角、尖沙咀，再加多程小巴，都只係七個八，仲平過獅隧單程隧道費！有咗長者八達通之後，佢周末多數畀司機提早放工，仲笑稱自己唔係「無良僱主」喎。
睇番議員小資料，原來議會長者族真係唔少，如富貴黨嘅方剛、工聯會嘅陳婉嫻、王國興、地產界嘅石禮謙、建仔嘅陳鑑林甚至立會主席曾鈺成，全部都年過六十五歲，加埋鄉議局劉皇發等，議會老齡化真係唔嘢少，明年立法會換屆選舉，踏入長者群嘅有啲已言退或部署緊退落嚟，但老而不休嘅始終佔多數。
