換糖罐 互禮讓 和氣收場
【本報訊】 雖然現時流行袋裝沙糖，但仍有不少茶餐廳沿用糖罐，公匙或公筷一時被烏龍「私用」，或私匙或私筷變「公用」都時有發生，詎料公私撈亂掀軒然大波。飲食業職工總會主席郭宏興指，小本經營的茶餐廳面對成本問題，一般會選擇購入一大包沙糖，裝入不銹鋼糖罐內供食客使用，一包重五十公斤的沙糖購入價為二百元，但獨立包裝的沙糖成本相對較高，因此茶餐廳維持「傳統」用糖罐，他建議有食客若誤用公匙，索性用下去，其他食客就會向侍應另取匙羹，這樣就化解了衝突。
「唔小心用錯實有」
郭表示，自○三年「沙士」後，港人使用公筷等共用餐具，而成為普遍衞生習慣，在酒樓更會將公筷用顏色區分，故甚少出現用錯筷子的情況：「不過唔覺意用咗都唔緊要，叫人換過支咪得囉。」他續指，若食客間互相禮讓，許多問題便能迎刃而解，「唔小心用錯咗（公匙）實會有，一係放喺個杯度，當冇事發生，下個食客發現冇咗隻匙，就會同侍應要過支。」若被私匙掂到糖罐，叫人換過罐就和氣收場。郭稱，職員若遇上食客爭執時，大多會上前勸喻，將雙方分開，「好多時分開佢哋後，如果老闆喺度，就唔使埋單啦，叫佢哋走咗先，或者叫弱勢啲嗰個走先。但如果有唔對辦，多數報警處理。」
食客和街坊亦對事件議論紛紛，有人認為在酒樓食飯都會「食食吓將公筷當私筷，咪換過支囉」，亦有食客指，大家有責任保持公用餐具衞生。居民張太認為事件中二人火氣太大，「畀我會溫柔啲同佢講，女仔講情況可能好啲。」蔡先生認為毋須為這種小事動怒，「叫樓面換過隻匙咪得囉。」李太指自己怕事，若遇上同類情況，會選擇不出聲。
