秋高氣爽，三五知己上船食海鮮，無疑係一件賞心樂事，之不過咁，如果船上消防安全措施不足，分分鐘樂極生悲，咁就唔好彩喇。

呢，筲箕灣避風塘中秋節發生火燒連環船悲劇，暴露重大安全隱患。本報記者事後到多個避風塘視察，結果發現問題多多，其中香港仔避風塘水上食肆開到成行成市，石油氣罐擺滿岸邊，唔少船隻更將多罐石油氣掛喺船身，亦有人搭橋將七、八艘船連成一氣，有人更自行從岸邊駁電，搞到電線縱橫交錯，萬一漏電，後果不堪設想。最得人驚嘅係，呢啲水上食肆全部係無牌經營，唔止存在安全隱患，衞生方面都好有問題喇。

筲箕灣避風塘亦唔好得幾多，船隻泊到密麻麻不特止，部分更盛載大量發泡膠箱、車胎及紙板，有船家甚至將固定船隻當電油儲存倉添，睇見都牙煙。正如有消防專家話齋，早前筲箕灣避風塘大火，好可能同船隻儲存過量燃料有關。你知啦，避風塘防火設施有限，只能靠消防處滅火輪灌救，如果消防處反應遲鈍，咁就大鑊嘅喇。好似上次火燒連環船咁，消防處就被船家炮轟救援不力，最終冇造成人命傷亡，純屬好彩嘅咋。

話時話，避風塘烏煙瘴氣，危機四伏，早就唔係新聞咯。就講船隻經營無牌食肆問題吖，本報兩年前已經報道過，當時食環署話發現問題會作出跟進喎，點知咁耐以來淨係檢控一兩間無牌食肆交差，港產官僚敷衍塞責，唔七國咁亂至奇喇。仲有超泊問題，同樣係十年如一日。隨着遊艇數目不斷增加，避風塘泊位需求亦不斷增加，表面睇泊位數量足以應付增長，問題係好多泊位位處偏僻，又冇配套，根本無人問津，加上有船家私下出租泊位，結果咪搞到問題惡化，危機四伏囉。對於呢啲亂象，海事處一直闊佬懶理，聽之任之，你話係咪不負責任吖。

正所謂，官不殺伯仁，伯仁因官而死。三年前造成三十九人死亡嘅南丫海難，海事處監管不力，難辭其咎，最離譜係事發後海事處口口聲聲加強監管，點知原來係得個噏字，家陣一樣係亂象叢生。

都係古人講得啱，船到江心補漏遲。預防勝於治療嘅道理一字咁淺，港產官僚冇理由唔明，佢哋只係抱着僥倖心理得過且過，結果埋下禍根，次次都要等到爆大鑊先識亡羊補牢，簡直豈有此理！