潮人「阿徐」徐濠縈喺巴黎時間七日前現身當地舉行嘅春夏時裝騷，仲透露聽日就返港。問佢喺巴黎經常趕睇騷會唔會感到辛苦？佢坦言：「都唔係好辛苦，但有時睇完要再去幫舖頭買貨就攰啲。」

徐濠縈喺巴黎經常趕睇時裝騷，但唔覺得辛苦。

眾所周知，阿徐鍾意跑馬拉松，提到本港將舉行一年一度嘅渣打馬拉松賽事，佢話仲未報名，有指報名參賽人數遠多於名額，淘寶甚至有炒名額嘅情況，阿徐笑謂：「中國人真係勁，繼炒黃牛之後連馬拉松都要炒。我諗我會報到名，因為有運動品牌幫我報，我老公（陳奕迅）今年負責為馬拉松唱主題曲，所以點都會報到名，唔知佢報唔報，我叫佢報咗先算，如果佢跑，我會陪佢跑。」

驚唔驚老公拖慢你？佢話：「都係，鍛煉吓佢，亦唔介意破唔到自己紀錄，但香港好難破紀錄，因為啲路高高低低，而且起步我又企得後，好難衝出重圍，破紀錄要睇天時地利人和，我有次喺東京跑條路好平，大會又安排得好，就可以。不過今次陪老公唔諗破紀錄，因為我要跑短途陪佢，佢只可以跑十公里，都唔知佢跑唔跑到，所以我要降班就佢。」

第一手消息請下載on.cc東網iPhone/iPad/Android/Windows Phone Apps