政壇：搞搞政：人大常委接班 馬逢國隨時甩轆
全國人大代表將喺一七年底舉行換屆選舉，其中全國人大常委范徐麗泰早前已表明屆時已七十二歲，唔會再參選，本來港區人大代表團團長譚惠珠最夠資格，但同樣因年紀大，相信唔會再選人大，於是外界一直估計副團長兼發言人馬逢國，較有機會接任人大常委，但有政界中人認為馬逢國未必「夠班」接任，擔心隨時「甩轆」，所以人大常委人選到目前仍然存有好大變數。
馬逢國同盧瑞安之前做開人大副團長，馬逢國更身兼發言人，多名人大都認為佢做得唔錯，加上不時列席人大常委會會議，可算係勤力同熟悉人大常委會運作，外界一直傳佢被看高一線。但有政界中人就指出，作為人大常委，最重要係能夠「鎮得住」各界，質疑馬逢國嚟自體育、演藝、文化及出版界，界別規模唔大，影響力絕對比唔上范太，如果出任人大常委，未必能夠擺平各界利益，相信馬逢國接任人大常委一職，仍然有好大變數，或者會轉由其他人大代表接任都未定。
傳資深政協空降出任
甚至有政界中人指出，除咗人大有機會出任人大常委，亦有可能「空降」出任，即係政協常委或已擔任兩屆以上嘅資深政協，「過檔」競選人大常委。不過，要選人大就要放棄政協身份，資深政協通常年紀比較大，到底仲有冇勇氣放棄政協而去選人大呢？
距離換屆選舉仲有一段頗長時間，但依家已傳聞滿天飛，又忽然傳出馬逢國未必「夠班」接任人大常，係咪有潛在對手向佢放暗箭呢？問馬逢國係咪想過做人大常委，以及資深政協「過檔」選人大常委係咪合適？佢就話冇諗過或考慮呢啲問題喎。
