政壇：至叻星：醫療券擴內地 高永文睇得遠

食物及衞生局局長高永文早前透露，特區政府諗住擴展長者醫療券計劃，日前已經接受畀已登記計劃、喺內地居住嘅長者，去香港大學深圳醫院求診時可使用醫療券，同時，政府同院方仲早已就醫療券嘅港幣同人民幣兌換機制達成好協議。聽落算照顧到一眾居於內地嘅港人長者噃。不過，尋日醫學會會長史泰祖就鬧政府嘅做法唔夠深思熟慮，佢擔心難以監察內地嘅醫療制度，一旦有醫療事故，港方難到內地搜證，佢仲踢爆政府事前無諮詢過醫學會嘅意見添！既然有咁嘅質疑，睇嚟高永文呢次只係瞻前但冇顧後喎，要拿拿聲完善番個機制先得呀！