政壇：方平郭振華唔玩區選

區議會委任制下屆取消，屬於委任區議員嘅葵青區議會主席方平原本都打算轉戰直選，但近日又決定放棄參選，會將重心放回個人同社團工作上。至於同樣由委任區議員出身、後來轉戰直選進身議會嘅深水埗區議會主席郭振華，亦都決定放棄競逐連任，相信佢身兼回收基金諮詢委員會主席，日後可以投放更多時間到環保同減廢嘅工作上。

回顧多年區議會工作，方平笑言區議會主席一職係燙手山芋，當年佢被委任後第一次開會即被踩場，事緣有議員提議於區議會上討論有關六四議題，方平諮詢過前輩的意見後，認為超出區議會職能加上沒有先例而拒絕有關要求，結果佢首次主持會議就遭泛民議員踩場，搞到要中途休會，令佢非常難忘。

至於郭振華則於九一年開始扎根在深水埗區議會工作，○七年轉戰直選，由委任議員變成民選議員。佢話當時第一次参選所用嘅口號「同住又一村，盡心為坊鄰」，就正正係佢呢二十多年地區服務嘅工作同喺議會職務崗位上嘅總結，同時係佢另一個新生活同挑戰嘅開始。