政壇：學聯樹根化 「唇寒齒亡」羞家
相信大家都領教過立法會議員鍾樹根嘅自創成語，曾經將「子虛烏有」講錯為「子烏虛有」，又將「明目張膽」講成「明張目膽」，更加自創「雞毛鴨蒜」，至今仍是網民熱話。諗唔到，學聯成員嘅中文水平亦與樹根不相伯仲，竟然錯將成語「唇亡齒寒」寫成「唇寒齒亡」印喺宣傳品上，更有學生影相上網，恥笑係「學界鍾樹根」，成為網上笑柄。
鍾樹根（資料圖片）
學聯易拉架寫上「大專學界唇寒齒亡」，被恥笑係「學界鍾樹根」。（互聯網圖片）
據了解，一向同香港大學關係密切嘅中文大學，計劃喺下周一舉行議政大會，討論學界就港大校委會事件嘅後續行動，更以易拉架宣傳。近日有人喺專頁「CUHK Secrets」貼文，指經過學校餐廳，發現學聯個易拉架寫住大大隻「大專學界唇寒齒亡」，令他「當堂嚇一跳，然後得啖笑」，更將學聯比喻成經常「創作」新四字成語嘅立法會議員鍾樹根。
網友紛紛留言，稱呢個係「Tree-gun-lization現象」，亦笑稱係「此乃子烏虛有指控」，亦有好心網友留言解釋「唇亡齒寒」嘅真正來源同用意。不過，有網友就反指「笑甚麼，畜生，你也是學聯會員。」似乎暗指中大退聯失敗之事。
