東網電視
更多新聞短片如果一個人無欲無求，真係有時講嘢都會放啲，唔需要再顧慮多多，講緊係現年六十六歲、盛傳明年立法會換屆選舉後唔再連任金融界議席嘅「星爺」吳亮星。星爺喺近半年第三次爆出金句，今次趁立法會內務委員會特別會議討論鉛水事件時，乘機詢問政府會唔會進行研究，睇吓香港人均壽命不斷延長，係咪同飲咗含鉛量適中嘅水有關。
星爺呢番言論真係事出突然，睇怕事前無人估計會咁樣演繹因果關係，政務司司長林鄭月娥喺會上「推莊」畀食物及衞生局局長高永文回答，高隨即忍住笑咁話，醫學上暫時無文獻或數據顯示鉛對身體有益。
及至會後，泛民議員劉慧卿就當面寸爆星爺，話如果鉛水真係延年益壽，咁就要飲多啲嘞！點知星爺竟然答佢日日都飲！話時話，星爺依家睇落仲好健壯，如果為撐政府要飲鉛水去到咁盡，真係戥佢有啲擔心。
早有前科 最少三次
星爺爆出金句撐政府早有前科，連同今次鉛水延年益壽論，近半年最少三次爆出金句，其他兩次同政改有關連，好似今年五月，即係政改方案表決前一個多月，星爺為咗反駁有人質疑負責提名特首候選人嘅提名委員會認受性，爆出「媽媽同你揀埋老婆又點樣，過去幾千年都係咁啦」嘅金句。
其後佢更喺特首答問大會借題發揮，批評泛民拉布影響經濟發展，直指「香港市民既需要民主，但更加需要嘅係銀紙」嘅妙論。一句到尾，星爺如果無番咁上下膽識，都唔會夠膽咁直腸直肚，睇怕未來一年，星爺喺毋須出任財務委員會主席嘅情況下，仲有大把爆金句嘅機會嘞！
第一手消息請下載on.cc東網
